Ытыктабыллаах Сахабыт сирин олохтоохторо!

Саха АССР төрүттэммитэ 100 сылынан уонна Улуу Убайбыт- Чаҕылхай Максиммыт төрөөбүтэ 125 сылынан итиитик-истиҥник эҕэрдэлиибит!

 100 сыл анараа өттүгэр, 1922 сыл муус устар 27 күнүгэр, Саха сирэ автономияны ылыммыта. Төлкөнү түстүүр дьаһал хотугу кыраайбыт саҥа олоҕо төрүттэнэригэр олук уурбута. Өрөспүүбүлүкэ тэриллиитэ үөрэх, култуура, наука күүскэ сайдарыгар, киэҥ сиринэн тайаан сытар сири промышленнай туһаҕа таһаарыыга көҕүлүүр күүс буолбута.

Биһиги бүгүн судаарыстыбаннаһы төрүттээбит Максим Аммосовка, Былатыан Ойуунускайга, Исидор Бараховка, сэбиэскэй кэм сирдьиттэригэр Илья Винокуровка, Семен Борисовка, Гавриил Чиряевка уонна кинилэри кытта Саха сирин кэлэр кэскилин бигэ акылаатын уурсубут дьоммутугар дириҥ ытыктабылбытын, махталбытын биллэрэбит.

Күндү доҕоттор! Ис сүрэхпититтэн эһиэхэ чэгиэн доруобуйаны, уҕараабат эрчими, ситиһиилэри, дьолу, уйгуну, эйэни уонна бары үтүөнү баҕарабын! Уруй-Айхал!